Heb 12 | MHL | STEP | Aria wi iiriw emeria mua eena opora baliwep opamik nain teeria maneka yia warikap ikowa saarik. Wi kekanep opora opamik nain yia kemapawiwkin kema aawem-ikaimik. Naeya Yeesus Krais ookowa naini kema unu-unowa-ke yia opap ikua nain iiraremi pina yia wasiem-ikaiya nain pun piipuikua. Piipuap Mua Maneka karuowa yia maek nain kekanep ikiwep fuuniyen.

Hebrews 12

Mua Maneka-na yiena Auwa-ke

1 Aria wi iiriw emeria mua eena opora baliwep opamik nain teeria maneka yia warikap ikowa saarik. Wi kekanep opora opamik nain yia kemapawiwkin kema aawem-ikaimik. Naeya Yeesus Krais ookowa naini kema unu-unowa-ke yia opap ikua nain iiraremi pina yia wasiem-ikaiya nain pun piipuikua. Piipuap Mua Maneka karuowa yia maek nain kekanep ikiwep fuuniyen. 2 I karuemi Yeesus mokoka toonep urufap karuiyen. I opora opimik nain onoma os, ne karuep fuunowanain pun onoma os. O eena ikoka kemelow manekiw ikainen naep kekanep sirirowa maneka aawep nomokow moke-pa umok. Nomokowa-pa umowa-na emin ururowa maa-ke, nain oram-ke naek. O aakisa ikip Mua Maneka pokap ikaiya nan aken ekeria-pa wiar pokap ikua. 3 Ni nain kema suuweka. Wi mua samora opora wiar fienami samoram-ikemik, nain o kekanek. Naapeya ni o kema suuwap kekanep ikowa nain kema me pinarowen.

4 Ni pina onowa miatinep kekanem-ikaiwkin nia samoram-ikemik, nain ni me iiwawun samor aawep umeman, weetak, ni eliw ikeman. 5 Mua Maneka nia kekanowami nia maek nain kema irinareman-yon. O muuka wiipa nia naemi maek,

“Yena muuk unowa, yo niena Mua Maneka-ke nia kakenami yoowa niiyem nain oram-ke me naeka. Ne pun ifana niariyem nain ni kema me samorareka.
6 Moram yo Mua Maneka-ke mua wia kookaliyem nain wia kakeniyem, ne wi mua yena muuka-ke wia naep wia kakenami yoowa wiiyem.”
(Gutpela Sindaun 3.11-12)

7 Naapeya ni yoowa aawowen-na ni Mua Maneka yia kakenowa nain-ke naep osiw ookeka. Moram yena muuka wiipa-ke nia naep naap nia oniya. Aria muuka kuisow wiawi-ko me kakeniya-i? Weetak, kakeninon. 8 Ne ni Mua Maneka muuk unowiya nia kakeniya. Me nia kakeninon-na ni me o muuka akena-ke, ni gunak siirka-ke nia naikuan. 9 I unowiya auwa onaiya ikemik, wis-ke yia kakeniwkin maemik, auwa eliwiya naap yia onamik. Naapeya i Mua Maneka yiena Auwa eena kukusa yiar urufiya, ne yia kakeniya nain, o opora anane wiar miimowa-ke ikua. Naap maep eliw akena ikaiyen. 10 I miiwa-pa epa iiwa ikemik fain auwa-ke yia kakenami yoowa yiimik, wiena amisa-pa naap yia onimik. Ne Mua Maneka naap weetak, o wi eliw akena ikauk naep anane yia kakeniya. Naeya o sira wiar aawep pina marew, dubil akena ikaiyen. 11 O yia kakenami yoowa yiiya. Nain i yoowa aawem-ikok maa eliwa-ke me naimik. Nain-ke ifana yiarem-ikaeya sira samora piipuap sira eliwa ookowa yiam paayap baliwep pokimik.

12 Naapeya ni wapena kekanowa marewarep merena umep ikeman nain kekanep ikeka. 13 Ni era saliwap soomareka, naeya kepura niar kirep ikua nain iiwawun me niar pusuninon. Naap niar ikok nainiw sariarinok.

Mua Maneka mikikira me iwiyen

14 Ni mua saria wiowa nain kema nain manekiw ikeka. Ne kema melina ikowa nain naap manekiw ikeka. Moram ni kema melina me ikowen-na Mua Maneka me urufowen. 15 Ni niam urufami ikeka, oko Mua Maneka yia kemalowa nain ni teeria mua oko o ookam-ikok piipuinon. Ne oko pun feenap, mua oko-ke opor sira oko maemi kema nia mikeya mua unowa wakiemi Mua Maneka mokoka-pa kema tumina ikowen. 16 Ne oko, alakirowa sira me ookeka. Ne Mua Maneka sira wiar ookowa kema ikeka, oko Iso sira onak naap arowen. O muuk iperowa-ke, ikoka wiawi epa wiar aawep maa muutitik urufinon. Ne iir oko-pa wiamun maa enowa wiar maalep enimekam naep inasin iperowa kekanowa nain maa oram-ke naemi wiamun iwok. 17 Neni nain wiar amisareman, aakisa fan wiawi epa wiar aawekam naep onak-na weetak, me pepek. Omawami wiawi maakek-na weetak. Wiawi era oko imenowa me pepekeya weetak naakek. Naapeya ni maa urufap.

I Saiyon ema-pa ikemik

18 Ni Mua Maneka wiar fuuneman nain me wi Isrel eena iiriw ema fuunemik naap. Ni ema fuuneman nain me maa urufap opowa-ke, weetak. Wi Isrel iiriw Sainai ema ikiwemik nain mukun onaiya ikua nain. Ne ama parin marew epa ruruparep ewar manekiw ikua nain. 19 Ne wi nan ikok puuw aluowa ne mua aakunowa miimamik. Naap miimap kema tootonep Moses omawami maakemik,” I mua iwakara aakuniya nain kiiriw miimowa miatinimik,” naap maemik. 20 Moram Mua Maneka opora wia maakek nain kekanowa onaiya ikua. Feenap maek, “Mua kuisow-ko ema fain mamaiya akena ekap me iimarinok. Naap iimarinok-na nomon ika wariwkin uminok. Ne maa eneka pun sira naap.” 21 Wi nain urufamik-na samor akena. Ne Moses pun kema tootonep maek, “Yos pun manek akena keker opap kema ipa siinarem,” naap maek.

22 Ni aakisa ikip fuuneman nain ema oko Saiyon naimik nain. Epa eena Mua Maneka owow iinan-pa ikua nain, nain unuma pun Yerusalem. Ne wi ensel teeria manek akena nan wiam fiirimep kemelam-ikaimik. 23 Nis pun Mua Maneka muuk iperowa areman, ne i unowiya yiam fiirimep ikaimik. I teeria nain yiena unuma Mua Maneka-ke iiriw owow iinan-pa yiar siisimep-puak. Ni Mua Maneka ikip ona wiar fuuneman, eena miiw mua unowiya baliwep yia mekawiya nain. Ne pun, iiriw wi mua kaken eliwa wia naek nain umep wiena kukusa dubila ikok ikip o wameiya ikemik, wi nain wiar fuuneman. 24 Naapeya ni yiena gone mua Yeesus wiar fuuneman. Mua nain opor enuma eena Mua Maneka yiamiya kaikeya os-ke ona aka-pa koonowak. Iiriw Abel umok nain aka miiwa-pa wiar orok nain muuna ururowa-ke

ikua. ^{▼▼12.24Iiriw ekera Abel weepe Kein-ke ifakimok. Aka wiar orok nain Mua Maneka-ke amisarek, naeya Kein pina nain kiripomami sirirowa iwok. Aria Yeesus aka orok nain, Mua Maneka-ke pina me yia kiripomiya. Yia saliwiya.} Aria Yeesus aka-ke oromi mua wia saliwinen naek. Naeya ni ikip o wiar fuuneman.

25 Naapeya ni maa urufami, oko o opora nia maakiya nain wiar fienowen. Feenap, iiriw Mua Maneka Sainai ema-pa wi Isrel opora wia maakek. Ne wi mikikira iwemik nain o bagiaw wiar urufami sirirowa maneka aawemik. Ne aakisa mua eena owow iinan-pa orop opora yia maakiya nain me miimiyen-na kamenap yia oninon? Bagiaw maneka me yia ofakowinon-i? 26 Ne iir nain Mua Maneka opora wia maakem-ikua nain miiw onaiya gariarem-ikua. Ne aakisa opora koonowami maek nain feenap, “Yo kiiriw miiwa ofofiyem nain me miiwa muutiw gariarinon, iinan pun iiwawun,” naap maek. 27 Opora fain, “kiiriw” maek nain feenap, maa unowa eena ona onomakek nain ikoka ofofeya gariaremi iiwawun mesenalinon. Naeya maa ikoka eena ofofeya me mesenalinon nain naap ikainon.

28 Aria feenap, i owow enuma eena me gariarinon neek ikaiyen. Naapeya i Mua Maneka yia kemalek nain sira eliwa naakikua. Yiena Mua Maneka-na mukuna eena maa kukumakeya iiwawun awiya nain-ke. Naapeya o ekima manek akena opap kookalowa wiar ookap lotu onam-ikaikua.